डोटी, चैत १० : कोरोना भाइरसको संक्रमणबाट बच्न जिल्लाका दुईवटा गाउँपालिकाले विपद् व्यवस्थापन कोष स्थापना गरेका छन् । जिल्लाको पूर्वी क्षेत्रमा पर्ने बोगटान फुड्सिल गाउँपालिकाले ५० लाख तथा पश्चिमी क्षेत्रमा पर्ने सायल गाउँपालिकाले ३० लाखको विपद् व्यवस्थापन कोष खडा गरेको छ । ती गाउँपालिकामा आज बसेको गाउँपालिकाको बैठकले सम्भावित खतरालाई ध्यानमा राख्दै यस्तो निर्णय गरेको सायल गाउँपालिकाका अध्यक्ष तेजबहादुर डुम्रेलले बताए । उनले भने, ‘कुनै आपत परिहाले तत्काल खर्च गर्न हामीले कोष खडा गरेका छौँ ।’

त्यस्तै बोगटान फुड्सिल गाउँपालिकाले आफनो गाउँपालिकाको प्रवेशद्वार गगुडामा हेल्थ डेस्कको स्थापना गर्नुका साथै कोरोनाको संक्रमणबाट बच्न ५० लाखको कोष स्थापना गरेको गाउँपालिका अध्यक्ष कमलबहादुर गडसिलाले बताए । उनले भने, ‘हामीले गाउँपालिकाको मुख्य प्रवेशद्वारमा हेल्थ डेस्क स्थापना गरेका छौँ, भारतबाट आएकालाइ अनिवार्य जाँच गरिने छ, विपद् परिहाले कोष बनाएका छौँ, कोरोनाको सामना गर्न तयार छौँ ।’

यतिमात्र नभई उक्त गाउँपालिकाले स्थानीय मष्टेश्वर मावि गगुडा, खत्याडी मावि, भगवतेश्वर मेल्टामा र सिमचौर माध्यमिक विद्यालयमा संक्रमतिलाई राख्न लागि क्वारेन्टाइन बनाउने तयारी गरेको छ । गाउँपालिकाको केन्द्र खत्याडीमा हेलिप्याड निर्माण गर्ने, भारत तथा बाहिरबाट आएका व्यक्तिका तथ्यांक संकलन गर्ने, अत्यावश्यक कामबाहेक स्वास्थ्यकर्मीलाई बिदा नदिने, स्वास्थ्य सचेतना फैलाउन स्वास्थ्यकर्मी र महिला स्वयम्सेविका परिचालन गर्ने तयारी गरिएको गाउँपालिका उपाध्यक्ष भवगती बमले जानकारी दिए ।

स्वास्थ्य जाँचपछि मात्रै घर जान पाइने

दिपायल सिलगढी नगरपालिकाले भारतबाट जिल्लामा आउन थालेका यहाँका स्थानीयवासीलाई जाँचपछि मात्रै आफ्नो घर प्रवेश गर्न दिने व्यवस्था मिलाएको छ । जिल्लाको प्रमुख व्यापारिक केन्द्र दिपायलस्थित पिपल्ला बजारमा कोरोना भाइरसको जाँच कक्ष नै खोलेर भारतबाट कामगरी घर फर्किन थालेका स्थानीयवासीलाई जाँचपछि मात्रै घर जान दिन थालेको छ । यहाँका बजार तथा गाउँघरमा केरोना भाइरसको संक्रमण आउन नदिन यस क्षेत्रमा प्रवेश गर्ने यात्रुलाई अनिवार्य रूपमा स्वास्थ्य जाँच शुरु गरिएको छ ।

नगरपालिककाले जिल्ला प्रशासन कार्यालयको समन्वयमा स्वास्थ्यकर्मी, नेपाली सेना, नेपाल प्रहरी तथा सशस्त्र प्रहरी परिचालन गरेर भारतबाट आउन थालेकाको चौबिसै घण्टा स्वास्थ्य जाँच गर्न थालेको छ । उक्त स्वास्थ्य जाँच स्थलमा भारतबाट आएकाको भिड लाग्न थालेपछि जिल्लाका अन्य स्थानीय तहबाट पनि स्वास्थ्यकर्मी मगाई स्वास्थ्य जाँच गर्ने व्यवस्था मिलाउन थालिएको नगरप्रमुख मञ्जु मलासीले बताए । स्वास्थ्य जाँच सहायता कक्ष नै स्थापना गरी सबै यात्रुको स्वास्थ्य जाँचको व्यवस्था मिलाएको जिल्ला स्वास्थ्य कार्यालय डोटीका प्रमुख रमेश मलासीले बताए ।

शनिबारदेखि शुरु गरिएको उक्त स्वास्थ्य जाँचको तेस्रो दिनसम्म कम्तीमा पनि करीब एक हजार यात्रुको ज्वरो मापन र अन्य स्वास्थ्य अवस्थाबारे जानकारी लिइएको शैलेश्वरी अस्पतालका चिकित्सक आइजङ्ग कुँवरले जानकारी दिए । जाँचका क्रममा कुनै पनि व्यक्तिमा ज्वरो, खोकी जस्ता समस्या नदेखिएको उनको भनाइ छ ।

त्यस्तै भारतबाट आएका स्थानीयवासीको स्वास्थ्य जाँचका क्रममा शङ्कास्पद लक्षण देखिए त्यस्ता व्यक्तिलाई राख्न जिल्ला अस्पताल डोटीमा एक छुट्टै आइसोलेशन कक्षको स्थापना गरिएको जिल्ला अस्पताल व्यवस्थापन समितिका अध्यक्ष यज्ञराज जोशीले बताए । नयाँ वर्षलाई सुदूरपश्चिमका स्थानीयले बिसु पर्वका रूपमा मनाउने गर्दछन् । त्यसैगरी डोटी चेम्वर अफ कमर्सले कोरोना भाइरसको जोखिमबाट बच्न गाडी चालक र सर्वसाधारणलाइ निःशुल्क रूपमा मास्क वितरण गर्नाका साथै स्वास्थ्य जाँचमा सहयोग गर्न थालेको छ ।