दुल्लू, वैशाख १६ : लकडाउन कारण रोकिएको बालबालिकालाई लगाइने नियमित खोप आजदेखि दुल्लू नगरपालिकामा सञ्चालन गरिएको छ । दुल्लु नगरपालिका अन्तर्गत रहेका ४२ वडा खोप केन्द्रहरुबाट त्यस क्षेत्रका सबै बालबालिकालाई खोप लगाइने जिल्ला अस्पताल दैलेखका जनस्वास्थ्य अधिकृत थिरप्रसाद रेग्मीले जानकारी दिए ।

नवजात शिशु जन्मेदेखि १५ महिना नपुगुन्जेलसम्म लगाइने खोपअन्तर्गत छुटेका खोपहरु लगाइने छ । जिल्लामा ११ स्थानीय तह रहेको भए पनि अन्य १० तहमा अर्को महिनाको पहिलो सातादेखि खोप कार्यक्रम सञ्चालन गरिने पनि उहाँले जानकारी दिए ।

नियमित रूपमा लगाउने खोपहरु लकडाउनका कारण त्यस क्षेत्रका हजारौँ बालबालिका खोप लगाउनबाट वन्चित भए पनि आजदेखि त्यो पूरा हुने उनले बताए ।