बर्दिया,मंसिर ७(फरकसमाचार) / लामो समय देखि बेपत्ता आफन्तको पर्खाइमा बसेका परिवारले आस मार्दै धमाधम काजकिरिया गरिरहेका छन् । न्यायको आसमा बसेका द्वन्द्व पीडित परिवारले न्यायको आस मार्दै धमाधम बेपत्ता आफन्तको काजकिरिया गर्न बाध्य भएका हुन् ।
बारबर्दिया नगरपालिका–११ बेलभारका भागिराम चौधरीले बेपत्ता दाजुको शनिबार अन्त्येष्टि गरेका छन् ।

भागिराम चौधरी द्वन्द्व पीडित समितिका अध्यक्ष हुन् । उनी लामो समय देखि बेपत्ता व्यक्तिहरुको बारेमा आवाज उठाउँदै आएका छन् । ‘लामो समयदेखि न्यायको आसमा बस्दा पनि पाएनौ,’उनले भने,‘आफन्तको अवस्थाको सत्य तथ्यको बारेमा थाहा नपाउँदै अन्त्येष्टि गर्न बाध्य भएका छौं ।’

उनका दाजु र भाउजू दुवै जनालाई विस २०५८ पौष ५ गते सेनाले नियन्त्रणमा लिई बेपत्ता बनाएको आफन्तले जनाएका छन् । बानियाभार फुपुको घरबाट चैतेलाल र उनकी श्रीमती सिताजानकी चौधरी बेलभार घर आईरहेको अवस्थामा उनीहरुलाई शाही सेनाले नियन्त्रणमा लिएको जनाईएको छ । उनीहरुसहित पाँच जना व्यक्तिलाई सोही दिन सेनाले नियन्त्रणमा लिएको थियो । उनीहरुलाई केही दिन चिसापानी ब्यारेकमा राखिएको त्यसपछि बेपत्ता बनाईएको पीडित परिवारको दावी छ ।

अघिल्लो साता राजापुर नगरपालिका–६ बिक्रमपुरका बेपत्ता राजकुमार थारुको परिवारले २३ वर्षपछि काजकिरिया गरेका थिए । द्वन्द्व पीडित समितिका अनुसार हालसम्म जिल्लाका बेपत्ता मध्ये ५० परिवारले कुशको शव बनाएर अन्तिम संस्कार गरिसकेका छन् ।
बर्दियाका २ सय ५८ व्यक्ति बेपत्ता रहेको पुरानो तथ्यांक र पछिल्लो पटक नयाँ ३ जना व्यक्ति बेपत्ता रहेको आवेदन परेको बेपत्ता पारिएका व्यक्तिहरुको छानबिन आयोगको तथ्यांक छ ।