अभिनव कुमार पाठक, बर्दिया,मंसिर ९/ लैङ्गिक हिंसा विरुद्धको १६ दिने अभियानको सन्दर्भमा गुलरियामा बृहत ¥याली निकालिएको छ । लैङ्गिक हिंसा विरुद्धको १६ दिने अभियान मूल समारोह समिति गुलरिया नगरपालिकाको आयोजनामा मंगलबार बृहत ¥याली निकालिएको हो । ‘प्रविधिको सही प्रयोग गरौं, लैङ्गिक हिंसा अन्त्य गरौं’ मुल नारासहित १६ दिने अभियान मंगलबार देखि सुरु भएको छ । उक्त अभियान मंसिर २४ गतेसम्म चल्नेछ । गुलरिया नगरपालिकाको प्राङ्गणबाट सुरु भएको ¥याली बजार परिक्रमा गरि पुनःनगरपालिका परिसरमा पुगेर कोणसभामा परिणत भएको थियो । ¥यालीका सहभागीले लैङ्गिक हिंसा विरुद्धको १६ दिने अभियान सफल पारौं, सबैको अधिकार सुरक्षित बनाउँ लैङ्गिक हिंसा अन्त्य गरौं, छोरा छोरी बराबरी, छोरीलाई दाइजो होइन शिक्षा दिऔं, बालविवाह अन्त्य गरौं, मानव बेचबिखन अन्त्य गरौं, लगायतका नारा लगाएका थिए ।
विशेषगरी महिला तथा बालिकाहरु लैङ्गिक हिंसामा परिरहेको विभिन्न तथ्यांक देखाएको नागरिक समाज संजालकी संयोजक हेमा सुनारले बताईन् । जसकारण वर्तमान समयमा प्रविधिको सही प्रयोग गर्न उनले आग्रहसमेत गरिन् ।
हाम्रो गाउँ समाजमा देखिएका लैङ्कि हिंसा अन्त्य गर्न सबैले सहजीकरण गर्नुपर्ने गुलरिया नगरपालिकाकी उप–प्रमुख सावित्रा गौतमले बताईन् । ‘आजभोलि प्रविधिको सही प्रयोग नगर्दा लैङ्गिक हिंसामा परेर आत्महत्या समेत गरिरहेको घटना देखिन्छ,’उप–प्रमुख गौतमले भनिन्,‘हामीले प्रविधिको सही प्रयोग गरी सक्षम बन्नुपर्छ ।’