बर्दिया, कार्तिक २१ / सशस्त्र प्रहरीद्वारा आयोजित निःशुल्क स्वास्थ्य शिविरमा ४ सय बढी सिमावर्ती नागरिकले सेवा लिएका छन् । सशस्त्र प्रहरी बल नेपाल नंम्बर ३१ गण सुरजपुरद्वारा गुलरिया नगरपालिका–१० रत्नापुर स्थित बिहीबार आयोजित निःशुल्क स्वास्थ्य शिविरमा ४ सय बढी सिमावर्ती नागरिकले स्वास्थ्य चेकजाँच गराएर सेवा लिएका हुन् । सशस्त्र प्रहरीले सुरक्षा प्रदानको साथै सिमावर्ती क्षेत्रमा गरेको रचनात्मक कार्यले सिमावासी खुसी देखिएका छन् ।

आफ्नै गाउँमा निःशुल्क स्वास्थ्य परीक्षण गराउन पाउँदा वडावासी खुसी भएको गुलरिया नगरपालिका–१० का वडा अध्यक्ष लक्ष्मी नारायण लोधले बताए । ‘उक्त शिविरमा दुवै देशका सिमावर्ती गाउँका नागरिकले सेवा लिएका छन्,’अध्यक्ष लोधले भने,‘सशस्त्र प्रहरीले शिविर आयोजना गरेर दुवै देशका सिमावर्ती बासिन्दा बिच आपसी भाईचारा कायम गर्न मद्दत पु¥याएको छ ।’

सशस्त्र प्रहरी सिमानामा दिनरात खटिएर नगरवासीलाई सुरक्षाको अनुभूति दिलाएको गुलरिया नगरपालिकाका नगर प्रमुख मुक्तिनाथ यादवले बताए । ‘खुल्ला सिमामा उहाँहरुको उपस्थितीले नगरवासीहरु रातभरि मज्जाले निदाउन पाएका छन्,’नगर प्रमुख यादवले भने,‘यस्तै सिमावर्ती नगरवासीको स्वास्थ्य चेकजाँचमा सशस्त्र प्रहरीले देखाएको चासो प्रशंसा योग्य छ ।’

सशस्त्र प्रहरी सुरक्षाका अतिरिक्त दुःख सुखको समयमा जनता माँझ पुगेको सशस्त्र प्रहरी बल नेपाल नं.५ बिन्ध्यावासिनी बाहिनी रुपन्देहीका सहायक बाहिनीपति सशस्त्र प्रहरी वरिष्ठ उपरीक्षक ध्रुव बहादुर कार्कीले बताए । ‘सशस्त्र प्रहरीले सिमावासीको पिर मर्का बुझेर उहाँहरुलाई कसरी खुसी राख्न सकिन्छ भन्ने उदेश्यले काम गरिरहेका छौं,’सप्रवउ कार्कीले भने,‘सिमावर्ती जनताको चाहना अनुसार सशस्त्र प्रहरीले विभिन्न कार्यक्रम आयोजना गर्दै आएको छ,सोही अनुसार शिविरको आयोजना गरि स्वास्थ्य चेकजाँच गरिएको छ ।’

निःशुल्क स्वास्थ्य शिविरमा ४ सय ६८ जना सिमावर्ती नागरिकले सेवा लिएको सशस्त्र प्रहरी बल नेपाल नंम्बर ३१ गण सुरजपुरका गणपति मानबहादुर शाहीले बताए । ‘२ सय ३९ जनाले आँखा, १ सय १८ जनाले कान, ८१ जना दात र ३० जनाले सामान्य स्वास्थ्य जाँच गराएका छन्,’गणपति शाहीले भने,‘उहाँहरुलाई आवश्यक पर्ने औषधी पनि निःशुल्कमा वितरण गरिएको छ ।’

सशस्त्र प्रहरी बल नेपाल नंम्बर ३१ गण सुरजपुरको आयोजना दिप डेन्टल क्लिनिक, नेपालगंज आँखा अस्पताल प्रालि र फेको एण्ड रेटिना सर्जिकल सेन्टरको प्राविधिक सहयोगमा एक दिने निःशुल्क स्वास्थ्य शिविर बिहीबार सम्पन्न भएको हो ।