अभिनव कुमार पाठक

बर्दिया,मंसिर ९ / लुम्बिनी प्रदेश सामाजिक विकास मन्त्रालयका मन्त्री जन्मजय तिमिल्सिनालाई ५६ विद्यालयका विद्यार्थीले सलामी अर्पण गरेका छन् । गुलरिया नगरपालिका स्तरीय अठारौं राष्ट्रपति रनिङ्ग शिल्ड तथा छैठौं मेयरकप खेलकुद प्रतियोगितामा सोमबार पार्चपास प्रर्दशन गर्दै ५६ विद्यालयका विद्यार्थीले मन्त्री तिमिल्सिनालाई सलामी अर्पण गरेका हुन् । विद्यार्थीले मार्चपास प्रर्दशन सलामी अर्पण गर्दा मन्त्री तिमिल्सिनाले मुसुमुस हाँस्दै हात जोडेर सलामी ग्रहण गरेको देखिन्थ्यो ।

मार्च पास प्रर्दशन गर्दा विभिन्न भेषभुषा र संस्कृति झल्किएको थियो । मार्च पास प्रर्दशनमा सहभागि भएका विभिन्न विद्यालयका विद्यार्थीहरु निकै खुसी र उत्साहित देखिएका थिए । आ–आफ्नो विद्यालयका पोसाक, स्थानीय भेषभुषासहित नेपालको झण्डा र हातमा बाँधेका झिलिमिलिले झन् आकर्षण थपेको थियो । मार्चपास प्रदर्शनले उपस्थित जो कोहीको ध्यान केन्द्रित गरेको थियो ।

मार्चपासमा माविको सामुदायिक तर्फबाट धु्रव मावि तुल्सिपुर र संस्थागत तर्फबाट जनज्योति सेकेन्डरी बोडिङ्ग स्कूल प्रथम भएका छन् । यस्तै प्राविबाट ओमशान्ति आधारभूत विद्यालय बालापुर र निमाविबाट श्री नेपाल राष्ट्रिय आधारभूत विद्यालय सोहेलवा प्रथम भएका छन् । मार्चपासको मुल्यांकन नेपाल प्रहरी, सशस्त्र प्रहरी र नेपाली सेनाका प्रतिनिधिले गरेका थिए ।

गुलरिया नगरपालिका–४ स्थिते खेलकुद मैदानमा सोमबार देखि मेयरकप खेलकुद प्रतियोगिताको सुरु भएको छ । लुम्बिनी प्रदेश सामाजिक विकास मन्त्री जन्मजय तिमिल्सिना र नगर प्रमुख मुक्तिनाथ यादवले संयुक्त रुपमा प्रतियोगिताको उद्घाटन गरेका थिए ।

नगरका १५ संस्थागतसहित ५९ विद्यालयहरुले प्रतियोगितामा सहभागिता जनाएको आयोजक समितिका संयोजक निर्मल उपाध्यायले बताए । जसमध्य ३ वटा विद्यालय मार्चपासमा सहभागी नभएको उनले जनाए । खेलकुद प्रतियोगिताको प्रतिस्पर्धाबाट राम्रो खेलाडी उत्पादन हुने विश्वास आयोजकले लिएको छ । खेलकुद प्रतियोगिता मंसिर १२ गतेसम्म चल्नेछ ।