बर्दिया,मंसिर २६/ विभेदका कारण नागरिकता र पतिबाट अंश नपाएकी बर्दिया बढैयाताल–४ की २२ वर्षीया अञ्जु थारूको मृत्यु दर्ता भने भएको छ । यस्तै उनकी सात वर्षीया छोरी अनिता थारूको पनि बुधबार जन्मदर्ता प्रमाणपत्र बनेको छ । अब अनिताले उमेर पुगेपछि नागरिकता र बाबुको जायजेथाबाट एकतिहाइ अंशसमेत पाउने भएकी छन् । पतिबाट उपेक्षित अञ्जुले अदालतमा अंश मुद्दा दायर गरेकी थिइन् । अदालतले अंश पाउने फैसला गरेको थियो तर नागरिकता नहुँदा उनले अंश पाउन सकिनन् ।

वडा र जिल्ला प्रशासनले उनलाई नागरिकता दिन मानेनन् । छोरी अनिताको जन्मदर्ता गर्नसमेत अस्वीकार गरे । नागरिकता पाउन नसकेर २२ कात्तिकमा अञ्जुले घरमै आत्महत्या गरिन् भने सँगै न्यायको लडाइँमा संघर्ष गर्दै आएका उनका बाबु ६१ वर्षीय कान्छा थारूले पनि चार दिनपछि छोरीकै बाटो पछ्याए ।

अञ्जु र उनका बाबु कान्छाले मृत्युको बाटो रोजेको बारे समाचार प्रकाशित भएपछि प्रधानमन्त्री सुशीला कार्कीले चासो राख्दै निर्देशन दिएपछि गृह मन्त्रालयले छानबिन समिति गठन गरेको थियो । समितिले काम थालेकै दिन बुधबार अञ्जुको मृत्युदर्ता र अनिताको जन्मदर्ता भएको हो ।

अञ्जुको मृत्युपछि उनका श्रीमान् अनिल थारूविरुद्ध दुरुत्साहन मुद्दा दायर भई पक्राउ पुर्जीसमेत जारी भएको छ । अनिल अहिले फरार छन् । अनिलका बुबा प्रसाद थारू सूचक बसेर अनिताको जन्मदर्ता र अञ्जुको मृत्युदर्ता भएको हो । अदालतले अनिलले पाउने जायजेथाको तीन भाग लगाउने, अनिल, अञ्जु र अनिताले एक–एक भाग पाउने फैसला गरेको थियो । तर हाल अञ्जुको मृत्यु भइसकेकाले अनिताको मात्र अंश कायम हुने र उमेर पुगेपछि अनिताले अदालतले ठहर गरेबमोजिमको अंश पाउने प्रमुख जिल्ला अधिकारी गोगनबहादुर हमालले बताए ।

गृहका सहसचिव एवं छानबिन समितिका संयोजक सुरेश पन्थीको उपस्थितिमा ७ वर्षीया अनिताको जन्मदर्ता भएको हो । समितिका संयोजक पन्थी, सदस्यद्वय गृहका उपसचिव कुलशेखर अर्याल र बर्दियाका सहायक प्रजिअ अशोककुमार भण्डारी, प्रमुख जिल्ला अधिकारी हमाल, प्रशासकीय अधिकृत विमल गुरुङ र प्रहरी उपरीक्षक सरोज पौडेललगायतको टोली पुग्दा पीडित परिवारका सदस्यले न्याय पाउनेमा आशावादी भएको बताएका थिए ।