बर्दिया, साउन २४ / पौडी खेल्ने क्रममा गोहीको आक्रमणमा परी वेपत्ता भएका बर्दियाको मधुवन नगरपालिका वडा नम्बर १ सूर्यपटुवा निवासी १९ बर्षिय रुप मिलन थारुको शव भेटिएको छ । साउन २० गतेदेखि वेपत्ता रहेका थारुको ५ दिनका दिन शनिवार घटनास्थदेखि करिव साढे २ किलोमिटर मुन्तिर घोप्टो परेको अवस्थामा शव भेटिएको छ ।

वेपत्ता थारुको शव क्षतविक्षत अवस्थामा फेला परेको मधुवन नगरपालिका वडा नम्बर १ का वडा अध्यक्ष मिन बहादुर थापाले बताए । मृतकका बावुले शवको पहिचान गर्नु भएको छ । ठाकुरबाबा नगरपालिका वडा नम्बर ९ मध्यवर्ती क्षेत्रमा कर्णाली नदीको भँगालोमा पौडी खेल्ने क्रममा गोहीको आक्रमणमा परी थारु बेपत्ता भएका थिए ।

त्रिभुवन मावि मधुवनबाट भर्खर मात्र १२ कक्षा पास गरेका थारुको शव गोठालाहरुले देखेपछि स्थानिय मार्फत प्रहरीलाई खबर गरिएको थियो । शव भेटिएको स्थानमा प्रहरीको टोली पुगी शव ल्याउने प्रकृया भैरहेको वडाध्यक्ष थापाले जानकारी दिए । वेपत्ता थारुको खोजीका लागि सुरक्षाकर्मी, निकुञ्ज एवम् स्थानियले खोजतलास गर्दै आएका थिए । शव पोष्टमार्टमको लागि बर्दिया अस्पताल गुलरिया पुर्याईएको प्रहरीले जनाएको छ ।