बर्दिया,भदौ ०१(फरकसमाचार)/मोटरसाइकल दुर्घटना हुँदा तीन जना घाईते भएका छन् । मधुवन नगरपालिका –९ स्थित हुलाकी सडक खण्डमा शनिबार सवा ६ बजे दुई मोटरसाइकल एक आपसमा ठोक्किएर दुर्घटना भएको हो ।

राजापुरबाट गुलरियातर्फ आउँदै गरेको भे १३ प ९०४१ नंम्बरको मोटरसाइकल र विपरीत दिशाबाट आउँदै गरेको भे ९ प ९०९६ नंम्बरको मोटरसाइकल एक आपसमा ठक्कर खाएका थिए । भे ९ प ९०९६ नंम्बरको मोटरसाइकल चालक जिल्ला दाङ घोराही उपमहानगरपालिका–६ का ३८ वर्षीय सन्तोष चौधरीको अनुहार र दुवै हात र खट्टामा चोट लागेर अवस्था सिरियस रहेको प्रहरीले जनाएको छ ।

सोही मोटरसाइकलमा पछाडि सवार राजापुर नगरपालिका–५ जयपुरका ३७ वर्षीय सुमित्रा चौधरीको अनुहार र दुवै हात खुट्टामा चोट लागेको छ । यस्तै भे १३ प ९०४१ नंम्बरको मोटरसाइकलका चालक मधुवन नगरपालिका–६ गुरुङ टोलका ५० वर्षीय ओम बहादुर गुरुङको दुवै हात खुट्टामा चोट लागेको र अवस्था सामान्य रहेको बर्दिया अस्पतालका मेडिकल अफिसर बैजु यादवले बताए ।

‘सिरियस रहेका सन्तोषलाई थप उपचारको लागि नेपालगंज रिफर गरेका छौं,’उनले भने,‘अवस्था सामान्य रहेकी सुमित्रा गम्भिर घाईते सन्तोषसंग गएकी छन्,यस्तै अर्का घाईते गुरुङलाई पनि रिफर गरेका छौं ।’