कार्यपत्र प्रस्तुत गर्दै उनले कोभिड–१९ देखा परेदेखि हालसम्मको विश्वव्यापी असर र प्रभावका बारेमा तथ्यगत प्रस्तुति गर्दै नियन्त्रणका लागि नेपाल सरकारले अपनाएका उपायको बारेमा जानकारी गराएका थिए । प्रस्तुतिको क्रममा उनले कोरोनाका बारेमा विभिन्न किसिमका भ्रम पनि फैलिएका र त्यसमा विश्वास नगरी सरकारबाट जारी भएका सूचना, तथ्याङ्क र विवरणलाई आधार मानेर सजगता अपनाउन आग्रह गरेका थिए ।

राष्ट्रिय योजना आयोगका सहसचिव एवं जानका सचिव डा किरण रुपाखेतीले कोभिड–१९ का बारेमा नेपाल सरकारले लिएका नीतिगत पहल र आगामी दिनमा लिनुपर्ने नीतिगत निर्णयका विषयमा प्रस्तुतीकरण गर्दै कोभिड–१९ का कारणले नेपालको अर्थतन्त्रमा परेको प्रभावका बारेमा अध्ययन भइरहेको र प्राप्त प्रतिवेदनका आधारमा सरकारले उपयुक्त कदम लिने बताएका थिए ।

जानका आजीवन सदस्य एवं नेपाल सरकारका सचिव खगराज बरालले नेपालमा समयमै सजगता अपनाउन सकेका कारण सम्भावित जोखिम न्यून हुन सकेको बताए । पूर्वगृहसचिव एवं जानका आजीवन सदस्य नारायणगोपाल मलेगोले जानले समसामयिक विषयमा सेमिनार आयोजना गरेकामा धन्यवाद दिँदै समसामयिक परिवेशमा कार्यक्रम सबैका लागि उपयोगी हुने बताएका थिए ।

जाइका नेपाल कार्यालयका प्रमुख युमिको आसाकुमाले समसामायिक विषयमा आयोजना गरिएको सेमिनार सान्र्दभिक र उपयोगी रहेको बताए । जाइका भुटान कार्यालयका प्रमुख कोजो वातानावेले जानले आयोजना गरेको कार्यक्रममा जाइका भुटान र जाइका अल्मुनाई भुटानलाई समेत सहभागी गराइएकामा जानलाई धन्यवाद दिए ।

प्रस्तुतीकरणपश्चात भएको छलफलमा सहभागीले आ–आफ्नो जिज्ञासा प्रस्तोतासमक्ष राखेका थिए । कार्यक्रममा नेपाल सरकार, जापानी राजदूतावास र जाइका नेपालका अधिकृतहरु, जाइका भुटान र भुटान सरकारका अधिकृतहरु र जानका सदस्यसमेत गरी ११० भन्दा बढी विभिन्न क्षेत्रका विज्ञको सहभागिता रहेको जानले जनाएको छ । कार्यक्रममा नेपाल र भुटानका बीचमा कोभिड–१९ रोकथामका सम्बन्धमा भए गरेका कार्यक्रमको अनुभव आदान प्रदान गरिएको थियो ।

जानका अध्यक्ष डा रामचन्द्र भुसालले जानले सधैँ समसामयिक विषयमा विभिन्न सेमिनार र गोष्ठी सञ्चालन गर्दै आएको बताउँदै भर्चुअल सेमिनारले जानका सदस्य र विज्ञको भौतिक उपस्थितिबिना नै बन्दाबन्दीको अवस्थामा समेत विचार आदानप्रदान गर्न सकिएकामा सहभागीलाई धन्यवाद दिए ।