काठमाडौं,मंसिर १०/ प्यालेस्टिनी चरमपन्थी समूह हमासले थप १७ जनालाई नियन्त्रणबाट मुक्त बनाएको छ । तर नियन्त्रण मुक्त भएकाको सूचीमा नेपालका विपिन जोशी छैनन् । हमासले १३ इजरायली र ४ थाई नागरिकलाई मुक्त गरेको बीबीसीले जनाएको छ । त्यसको बदलामा इजरायलले ३९ प्यालेस्टिनीलाई छोडेको छ । इजरायलले छाडेका ३९ जनामध्ये ६ जना महिला छन् । अरु सबै १८ वर्षभन्दा कम उमेरका रहेका छन् ।

उनीहरुलाई अन्तर्राष्ट्रिय रेडक्रस संगठन (आईसीआरसी)का प्रतिनिधिहरुले बस चढाएर वेष्ट बैंकको बैतुनिया शहरतर्फ लगिरहेको भिडियो फुटेज देखिन्छ । कतारको मध्यस्थतामा इजरायल र हमासबीच चार दिने अस्थायी युद्धविराम र बन्दी साटफेर सम्झौता भएको थियो । उनीहरुबाट मुक्त गरिएकाहरुलाई आईसीआरसीको जिम्मा लगाउने गरिएको छ ।

पहिलो पटक गत शुक्रवार हमासले १३ इजरेली, १० थाई र एक फिलिपिनोसहित २४ जनालाई मुक्त गरेको थियो । दोस्रो पटक हमासले थप १७ जनालाई नियन्त्रणबाट मुक्त गरेको र इजरायलले ३९ जना प्यालेस्टिनी बन्दीहरूलाई रिहा गरेको इजरायल डिफेन्स फोर्सले पुष्टी गरेको छ । हमासले छाड्ने बन्धकहरुको तुलनामा तेब्बर संख्यामा इजरायलले बन्दीहरुलाई मुक्त गर्दै आएको छ ।

गत अक्टोबर ७ मा हमासले इजरायलमा गरेको आक्रमणमा १० नेपालीसहित १ हजार २०० जनाको ज्यान गएको थियो भने २४० जनालाई उसले बन्धक बनाएको थियो । नेपालको कञ्चनपुरका विपिन जोशीलाई पनि बन्धक बनाएको बताइएको छ । तर उनी रिहा हुने/नहुने अझै थाहा हुन सकेको छैन । यद्यपि परराष्ट्र मन्त्रालय र तेल अविवस्थित नेपाली दूतावासका अधिकारीहरुले जोशीको रिहाइका लागि कूटनीतिक पहल जारी राखेको जनाएका छन् ।

सरकारको प्रयास जारी

परराष्ट्र मन्त्रालयकी प्रवक्ता सेवा लम्सालले विपिन जोशीको रिहाइका लागि सरकारले पहल जारी राखेको बताइन् । ‘सरकारले पूरै क्षमताका साथ कोसिस गरिरहेको छ, तर अहिलेसम्म नयाँ खबर केही आएको छैन,’ उनले भनिन्, ‘हामी सुखद समाचारको प्रतीक्षामा छौं ।’

सुदूरपश्चिम विश्वविद्यालयको कृषि विज्ञान संकायमा अध्ययनरत विपिन सहितका ४९ विद्यार्थीहरु ‘लर्न एण्ड अर्न’ कार्यक्रमअन्तर्गत गत भदौ २७ गते इजरायल गएका थिए । गत असोज २० गते किबुजस्थित कृषि फार्ममा हमासले गरेको आक्रमणमा परी १० नेपाली विद्यार्थीको मृत्यु भएको थियो भने कञ्चनपुरको भीमदत्त नगरपालिका-३ का जोशी सम्पर्कविहीन भएका थिए ।

परराष्ट्र मन्त्री एनपी साउदको सचिवालय र मन्त्रालयका अधिकारीले यही मंसिर महिनाको सुरुवातमा जोशी गाजामा फेला परेको सुखद समाचार रहेको भन्दै मिडियामा सूचना दिएका थिए । तर उनको पछिल्लो अवस्था थाहा हुन सकेको छैन । हमासले इजरायलमा गरेको आक्रमणलगत्तै इजरायलले युद्ध घोषणा गर्दै सैन्य अभियान चलाएको थियो ।

त्यसयता इजरायलले प्यालेस्टाइन क्षेत्रमा गरेको आक्रमणमा १४ हजार ५०० जनाभन्दा बढी मारिएको हमासद्वारा सञ्चालित स्वास्थ्य मन्त्रालयले जनाएको छ । झण्डै १० लाख मानिस विस्थापित भएको अनुमान छ । इजरायल हमास युद्धका कारण मानवीय संकट गहिरिँदै गएपछि अहिले अस्थायी युद्धविराम गरेर बन्दी मुक्त गर्ने काम चलिरहेको छ ।अनलाइनखबरबाट साभार