काठमाडौं, फागुन १२ :  अन्तर्राष्ट्रिय महिला दिवसको अवसरमा नेपाली तथा अन्तर्राष्ट्रिय कलाकारहरुको कला प्रदर्शन हुने भएको छ। यही फागुन २५ गतेबाट बबरमहलस्थित नेपाल आर्ट काउन्सिलमा प्रदर्शनी गरिने चाकुपाटस्थित क्लासिक ग्यालरीले जनाएका छ ।

सन् २०१० देखि ग्यालरीले निरन्तर अन्तर्राष्ट्रिय महिला दिवसमा चित्रकला प्रदर्शन गर्दै आएको ग्यालरीको प्रमुख सरिता डङ्गोलले बताइन् । ‘इनफिनिटथट्स’ नाम दिएको प्रदर्शनीमा नेपाली कलाकारका साथै जापान, बेल्जियम, अमेरिका, भारतलगायत १३ देशको चित्रकला हेर्न पाइने छ। प्रदर्शनीमा चित्र, सेरामीक, प्रफोमेन्स, प्रिन्ट मेकिङ र स्कुल्पचर कलाको संयुक्त प्रदर्शन हुने उनले जानकारी दिइन् ।

नेपाली र विदेशी कलालाई एक साथ प्रदर्शन गराउँदा नेपाली र विदेशी कलाकारिताको भिन्नता सिक्न पाइने बताउँछिन् । ५० जनाको चित्रकला रहने प्रदर्शनीबाट संकलित केही रकम स्वयम्भूस्थित सुनगाभा संस्थालाई प्रदान गरिने आयोजकले जानकारी दिए । उक्त संस्थामा रहेका डाउनसिन्ड्रोम छात्राहरुलाई उक्त रकमले चित्रकला सिक्न केही सहयोग पुग्ने आयोजको विश्वास छ। ओमन आर्ट वर्ल्डको सहकार्यमा हुन लागेको चित्रकला प्रदर्शनी फागुन ३० सम्म चल्नेछ।