पोखरा, माघ १८ : स्याङ्जाको आँधीखोला गाउँपालिका–१ स्थित पञ्चमूलमा रु १० लाखमा ब्राह्मण समुदायको इतिहास, परम्परा र संस्कृति झल्किने संग्रहालय निर्माण गरिने भएको छ । पर्यटकीय गाउँ सिरुबारीको निकटमा अवस्थित उक्त स्थानमा नेपाल पर्यटन बोर्ड गण्डकी प्रदेशको पाँच लाख र स्थानीय बासिन्दाको पाँच लाख जनसहभागिता परिचालन गरी संग्रहालय बनाउन लागिएको हो ।

संग्रहालयमा ब्राह्मण जातिका कला, संस्कृति भल्किने वेषभूषा, गरगहना, परम्परागतरुपमा उनीहरूले प्रयोग गर्ने कृषि उपकरणसहित माटो, काठ, फलाम, पराल र चोयालगायतका विभिन्न घरयासी सामग्री प्रदर्शन गरिने छन् ।

गण्डकी प्रदेशका उद्योग, पर्यटन, वन तथा वातावरणमन्त्री विकास लम्सालले एक समारोहका बीच सो संग्रहालयको शिलान्यास गर्दै मलुकका सम्पूर्ण जातजातीका कला संस्कृति जगेर्ना गर्नु आजको आवश्यकता भएको बताए ।

प्राचीन सभ्यतालाई जीवन्त राख्ने यस्ता संग्रहालयले मुलुकको पर्यटन प्रवद्र्धनमा महत्वपूर्ण योगदान पुग्ने उल्लेख गर्दै उनले पछिल्लो समय संग्रहालय अध्ययन अवलोकन गर्ने पर्यटकको संख्यामा वृद्धि भएको चर्चा गरे ।

संविधानसभाका सदस्य प्रा डा गणेशमान गुरुङ र गण्डकी प्रदेशसभा सदस्य मीनप्रसाद गुरुङले ब्राह्मण संग्रहालय पर्यटकको एक गन्तव्यस्थल बन्ने विश्वास व्यक्त गरे । ब्राह्मण जातिको मौलिककला संस्कृति जोगाउने अभियानका साथ सामुदायिक संग्रहालय निर्माण गर्न लागिएको संग्रहालय व्यवस्थापन समितिका अध्यक्ष छमप्रसाद ढकालले जानकारी दिए । संग्रहालय पाँच रोपनी जग्गामा निर्माण गरिन लागिएको हो ।