चर्चित संगितकार वसन्त सापकोटा र गायक सञ्जिव पराजुलीको नयाँ गीत ‘बालापनको उमेर–२’ सार्वजनिक भएको छ । ‘नाई मलाई थाहा छैन्’, ‘किन कर्के’ जस्ता प्रसिद्ध गायक सञ्जिव पराजुलीको स्वरमा नयाँ गीत सार्वजनिक भएको हो । बिहीबार सार्वजनिक गरिएको गीतलाई ‘बालापनको उमेर २ – बाल्यकालको सम्झना’ नाम दिइएको छ।

‘बालापनको उमेर’को दोस्रो भागको रुपमा तयार गरिएको यस गीतमा शब्द तथा संगीत वसन्त सापकोटाले दिएका छन्।

गीतको छायांकन ललितपुरको छम्पी देवी उच्च माध्यमिक विद्यालयमा गरिएको हो। गीत खिचिएकै स्थानमा पुगेर भिडियो सार्वजनिक गरिएको छ। गायक पराजुलीले भने, ‘जुन स्कुलमा हामीले खिचेका थियौँ, त्यहीँका विद्यार्थी भाई–बहिनीहरुसँग बसेर गीत सार्वजनिक गर्ने मन भएर सोही स्कुलमा पुगेका थियौँ।’

त्यहाँ पुगेर विद्यार्थीहरुलाई भिडियो देखाउदा उनीहरुले भिडियोलाई निकै राम्रो भएको प्रतिकृया दिएका थिए। आफ्नो विद्यालयलाई भिडियोमा देख्न पाउँदा उनीहरु खुसी थिए। भिडियो निर्माण टिमले सुटिङ गरिएको स्कुलमा केही आर्थिक सहयोग पनि गरेको गायक पराजुलीले बताए।

गणेश शाहीको निर्देशनमा बनेको भिडियोमा सन्जिव पराजुली, सिम्रन कार्की, विप्रभ सापकोटा, सालिन पराजुली र सन्रिका भट्टराईको अभिनय रहेको छ। प्रभा आचार्य साहायक निर्देशक रहेको भिडियोलाई फराज अर्पनले छायांकन तथा सम्पादन गरेका हुन्।