मुग्लिन–नारायणगढ सडक आयोजनाका इञ्जिनीयर शिव खनालकाअनुसार १५ मजदुरले अहिले नियमित काम गरिरहेका छन् । मजदुर थप्न नसकिए पनि पहिलेदेखिनै काम गर्दै आएका मजदुरलाई क्वारेन्टाइनमा राखेर काम गराइएको छ । पुलमा अहिले ढलानका लागि सेन्टिङ र रड बाँध्ने काम भइरहेको छ । खनालले भने, “नियमित काम गर्न सकेमा र सामग्री पाएमा वैशाखको २०–२२ गते सम्ममा हामी ढलान गर्छौं ।”

नारायगढ–मुग्लिन सडक फराकिलो बनाइएको भए पनि त्यहाँ रहेका १९ वटा पुल साँघुरा थिए । सडक नौ मिटरदेखि ११ मिटरसम्म फराकिलो बनाइएको छ । पुल भने पाँचदेखि छ मिटरसम्म मात्र फराकिलो रहेका छन् । सडकको पुनःनिर्माण सकिएसँगै चार पुलको निर्माणकार्य सुरु गरिएको थियो । जसमध्ये दासढुङ्गा, खानी र मौरी पुलको निर्माणकार्य सकिए पनि जलबिरे पुलको भने अहिलेसम्म ६२ प्रतिशत मात्रै काम सकिएको आयोजनाले जनाएको छ । रु १३ करोड ९५ लाख लागत रहेको जलविरे पुल ८० मिटर लम्बाइ र ११ मिटर चौडाइको हुनेछ ।

डिसेम्बर २०१७ बाट निर्माण सुरु गरिएको पुल सम्झौता भएको २१ महिनामा निर्माण सकिनुपर्ने हो तर निर्माणका क्रममा पटक–पटक डिजाइन परिवर्तन गर्नुपर्दा ढिलाइ भएको हो । पुल निर्माण गर्ने स्थान अप्ठ्यारो ठाउँ भएकाले काम गर्दै डिजाइन परिवर्तन गर्दै गर्नुपरेको खनालले जनाकारी दिए ।

जलविरे मन्दिरसँगै जोडेर बनाइएको यो पुल निर्माण सम्पन्न भएपछि नारायणगढ–मुग्लिन सडकको दूरी ३ सय मिटर घट्ने छ । अहिले यो सडकको दूरी ३६ किलोमिटर छ । राजधानी काठमाडौं प्रवेश र बाहिरिने प्रमुख सडक भएकाले यो सडकमा सवारी चाप उच्च छ । दैनिक १० हजार सवारी साधन आवतजावत गर्ने जनाइएको छ ।