बर्दिया,मंसिर १४ (फरकसमाचार)

लुम्बिनी प्रदेशका आन्तरिक मामिला तथा संचार मन्त्री तिकल शर्माले बर्दिया प्रिमियर लिग–२ क्रिकेट प्रतियोगिताको सोमबार उद्घाटन गरेका छन् । गुलरिया नगरपालिका–४ कवर्डहलको खेल मैदानमा क्रिकेट प्रतियोगिता सुरु भएको हो । ‘स्वास्थ्यका लागि खेलकुद, राष्ट्रको लागि खेलकुद’ मुल नाराको साथ नयाँ शिरा युवा क्लवले आयोजना गरेकोमा मन्त्री शर्माले धन्यवाद व्यक्त गरे । ‘खेलकुदले मानिसलाई निरोगी बनाउँछ’ मन्त्री शर्माले भने, ‘खेलकुदका कारणले मानिसमा लागेका रोगहरु ९० प्रतिशतसम्म रोग सिदिन्छ ।’ मानिस निरोगी हुन खेलकुदले महत्वपुर्ण भुमिका खेल्ने बताए ।

खेलकुदले मानिस मानसिक तथा शारीरिक रुपले स्वस्थ्य रहन्छ । स्वस्थ्य मानिसले देश विकासमा योगदान पु¥यान मद्दत गर्छ । त्यसैले खेलकुदको महत्व रहेको मन्त्री शर्माले बताए । युवा क्लवले आयोजना गरेको क्रिकेट प्रतियोगिताले बर्दियालाई देशमा चिनाउने बताए । जिल्लाको खेलकुद क्षेत्रको विकासमा आफ्नो तर्फबाट सहयोग गर्ने मन्त्री शर्माले प्रतिबद्धता व्यक्त गरे ।

अन्तर्राष्ट्रिय क्रिकेट प्रतियोगिताबाट संन्यास लिएका नेपाली राष्ट्रिय क्रिकेट टोलीका पूर्वकप्तान शक्ति गौचन खेलाडीहरुको मनोबल बढाउन उद्घाटन समारोहमा सहभागिता जनाएका थिए । सशस्त्र प्रहरी बल नेपाल नम्बर ३१ गणका गणपति नरबहादुर रावत लगायत खेल प्रेमीहरुको उपस्थिती रहेको थियो ।

युवा क्लवका अध्यक्ष प्रमोद चन्दको स्वर्गीय बुवा बीर बहादुर चन्दको सम्झानामा बर्दिया प्रिमियर लिगको आयोजना भएको छ । जिल्लाका २ टिम र अन्य जिल्लाका ६ टिमले क्रिकेट प्रतियोगितामा सहभागिता जनाएका छन् । बर्दियाबाट बर्दिया क्रिकेट एकेडेमी र रोयल किङ्गस्, बाँकेबाट बाँके ११, धनगढी क्रिकेट एकेडेमी, महेन्द्रनगर क्रिकेट एकेडेमी, हिमालयन क्रिकेट एकेडेमी काठमाडौं, नेशनल एकेडेमी बुटवल र स्टार एकेडेमी भैरहवाले प्रिमियर लिगमा भाग लिएका छन् ।

प्रिमियर लिग क्रिकेट प्रतियोगितामा प्रथम हुने टिमले रु. १ लाख ११ हजार १ सय ११ पुरस्कार पाउनेछ । त्यसैगरी दोस्रो हुने टिमले ५१ हजार १ सय ११ पुरस्कार पाउने आयोजक क्लवले जनाएको छ । सोमबार बर्दिया क्रिकेट एकेडेमी र रोयल किङ्गस् टिम बिच भएको खेलमा रोयल किङ्गसको जित भएको छ । आज (मंगलबार) रोयल किङ्गस भिएस स्टार क्रिकेट एकेडेमी र बर्दिया क्रिकेट एकेडेमी भिएस बाँके ११ बिच प्रतिस्पर्धा हुनेछ ।